DUWWELD EN DWARS TOT DIE DOOD

dank god die reën het gekom
en alles kom oormekaar gooi
en duwweltjies in die voetpaadjie
afgespoel tot by die krale, suipings
hekke en dongas,
waar jy my liewe lam jou dors
gaan les en ronddwaal
met sonsak
en met jou klein blêr-lam-krete
roep na die hemel daar bo
want die duwweltjies
groei nou in die uitgetrape
veld waar jou gaan wei het
my lam…
waar jy wou eet
my lam
waar jy wou rus
my lam

die swam op die duwweltjie
het jou vergiftig
my lam
tot jy daar bly lê het…
dikkop
alleen
seer
en toe reën dit saggies
tot die volgende droogte….
totsiens, my Lam…totsiens.